89

لکه واړه ماشومان زبېښو لکه ګوړه تقوا
موږ ساده ګانو سپین ایمان بایلود په خړه تقوا
 

څنګه شوو پاتي د سیالانو له سیالیو څخه
 څنګه اخته کړو په خپل ځان کې په جګړه تقوا

پاک مسلمان و، پاک ایمان و، څه بلا یې غوښته
 له خړ خروټي، له ترکي له اندړه تقوا

سپینه پښتو وه، هر یو کار په بسم الله و زموږ
 اوس لکه ګونګ غوندې بڼېږو په تتړه تقوا

ځان یې خراب کړو، او تقوا یې هم خرابه کړله
ټیټ بندګان دي، د دوی څه کار و په لوړه تقوا

 

90

چې یې سن او تجربه په هلک زیات وي

د پخو نجلکیو سُر او نمک زیات وي

چې وي ډېره موښل شوې شاربل شوې
طبېعي ده خوند د هغې غړک زیات وي

هومره قدر به یې کېږي په کاله کې
د سړي چې څومره زور د کوتک زیات وي

له غیابه فیصله کول خطا ده
چې لیدلې وي، هغو ته درک زیات وي

اندامونه وي د نجونو رکعتونه
پروا نشته که تش زیات وي که ډک زیات وي


*** خانه خدای خبر که به دې علم
په دې کار کې تر لمسي د فیضک زیات وي

 

 

91

زړه مې کور دی زړه مې ځای د ښایسته وو
قدردان یمه په خدای د ښایسته وو

دا له کله یم اشنای د ښایسته وو
له ازله یم اشنای د ښایسته وو

یو نبي راغی خاتم د انبیاوو
یو ښایسته نه راغی پای د ښایسته وو

تر عهده د لویو لویو یم وتلی
تر عهده نشم وتای د ښایسته وو

په ثنا وو که تارونه که پردې وې
که څپې وې او که نای د ښایسته وو

په یوڅو ښکلیو کې چېرته را ایسار وای
څه نازونه به مې وړای د ښایسته وو !

 

 

 

 

92

ستا خال به ښایسته وي که زما د زړګي داغ
 راځه چې سره کېږدو دا څراغ او دا څراغ

راځئ چې کړو معلومه چې جنون اصلي جنون
 زموږ په زړونو سپور دی که د ښکلیو په دماغ

څو ښکلي څو ګلونه چې راټول شي په یوه ځای
 سپیره سیمه هم داسې معلومېږي لکه باغ

 

 

 

 

93

زړه مو تش نه دی عادت-- زړه مو ډک ګرځوو موږ
په هر ګل پسې یو زړه -- (یو پتک) ګرځوو موږ

ګوناهونه مو اصیل-- ثوابونه مو اصیل
که کرک ګرځوو موږ--- که هلک ګرځوو موږ

که مو دوه ګزه شمله -- که مو ګرده ده لمن
که د خاوري کنډولي-- که سنک ګرځوو موږ

که سپېره مخونه یو-- که زېږه لاسونه یو
که رباب خوښوو موږ -- که توپک ګرځوو موږ

د غلیم لپاره هم-- د فرصت په لټه یو
په دې مږې پسې تل-- یو تلک ګرځوو موږ

چې نمک د چا څکو -- بیا په ژبه او په خوله
تر قیامته پورې خوند-- د نمک ګرځوو موږ

اورو، اورو خو ضرور-- خو ځان نه ور پوهوو
د خپل زړه غوږونه تل -- داسې څک ګرځوو موږ

مېلمه ستړی ستړی شي -- چې سرزوري کلیوال
یې په کلي کې بېټک- په بېټک ګرځوو موږ

غلیم څه دی غلیم څوک ـ ـ غلیم نه دی د چا زوی
په یوه سوک باندې چې سر-- په فلک ګرځوو موږ
 

 

 

 

94

نه یم په حال کله چې نه ښکارېږې
دا چېرې یې ګله چې نه ښکارېږي؟

زه تا له دومره نیږدې نه وینمه
ښه نو بیا یې څله چې نه ښکارېږې؟

وبښه، تا نه، ستا ښایست یادوم
هغه خو وي، خپله چې نه ښکارېږې

لا مې په زړه یې، لا دې ښه وینمه
آشنایه ډېر ځله چې نه ښکارېږې